Sumuko idi Pebrero 14, 2026 ti suspek iti pannakapapatay ti maysa a 19 anyos nga estudyante ti Nueva Vizcaya State University, kalpasan ti napigsa nga operasyon ken imbestigasyon ti Philippine National Police (PNP) iti Quezon, Nueva Vizcaya. Daytoy ket simmaruno iti pannakarekober ti bangkay a napuoran idi Pebrero 12 iti Brgy. Madiangat, Quezon.
Kalpasan ti insidente, dagus a nangisayangkat iti case conference ni PCol Paul T. Bometivo, Provincial Director ti Nueva Viscaya, a nangipangulo iti panangadal iti CCTV recordings, follow-up investigations, ken panagurnos iti kaso. Ti panagkaykaysa dagiti imbestigador ken intelligence officers manipud iti Quezon Police Station ken Provincial Intelligence Unit ket nangted iti napartak ken napigsa a progreso iti kaso.
Ti suspek a naipakilala kas alyas “Ernie,” 33 anyos, maysa a tricycle driver ken residente ti Brgy. Madiangat, ket naibilang nga person of interest iti umuna. Nupay kasta, idi Pebrero 13, gapu iti tumtumaray a pamigbig ken ebidensya a nakolekta, nagdesisyon isuna a sumuko iti otoridad ken inaminna ti krimen. Ita ket adda isuna iti kustodiya ti Quezon Police Station para iti dokumentasyon ken ad-adu pay a pannakaimbestigar.
Kas paset ti naun-uneg a panagsukimat, impatungpal met ti Nueva Vizcaya Police Provincial Office ti Search Warrant No. 010-2026 iti maysa a black a lugan a pinatien a naaramat iti panangaramid ti krimen. Dagiti narekober a banag ket maipatulod iti forensic examination tapno makatulong iti pannakapatalged ti ebidensya ken pannakabukel ti kaso.
Daytoy a napartak nga aksyon ti PNP ket mangipakita iti kinapudno ti panagserbi kadagiti umili—napartak, naurnos, ken responsable. Babaen iti naingat nga imbestigasyon ken panangsalaknib iti komunidad, pinaneknekan ti kapulisan a saan a maipalubos ti krimen, ken ti hustisya ket agtultuloy a maipaay kadagiti biktima ken pamiliana.
Source: DWRV1233.Official
