Nagpalagip ni Ma. Estrella Genoveza, Medical Officer IV iti Internal Medicine Unit ken cardiologist iti Cagayan Valley Medical Center (CVMC), maipapan iti panagpababa ti edad dagiti maapektaran iti heart attack iti pagilian. Kunana a paubing nga paubing dagiti kaso gapu iti saan a nasayaat a panagbiag wenno “unhealthy lifestyle” dagiti tattao.
Iti programa a “Kaygandang Kalusugan” ti Provincial Health Office (PHO), natalged a naibingay ti impormasion maipapan iti agtultuloy a panagngato dagiti kaso ti sakit ti puso. Naited met ti pammatalged a ti heart attack ket maysa kadagiti kangrunaan a gapu ti ipapatay dagiti Pilipino iti agdama.
Segun kenni Dr. Genoveza, no idi ket kadawyan a 40 anyos wenno nangatngato ti edad dagiti pasyente, ita ket addaen dagiti kaso iti late teens ken young adults. Dagiti kangrunaan a rason ket sobra a panangan iti nataba ken namantika a makan, panagsigarilyo, sobra a panaginom ti arak, awan ehersisyo, naapgad a makan, ken uray pay ti hereditary factors.
Inlawlawag ti doktora a ti heart attack ket kadawyan a maipanggep iti panagbara dagiti ugat iti puso. No saan a maagapan, mabalin a mapan iti heart failure. Dagiti sintomas a masapul a bantayan ket panagsakit ti barukong (dibdib), panghihina, ken nalaka a mahingal. Inayon na a no ti panagsakit ti dibdib ket saan a mapukaw iti nasurok 20 minutos, mabalin a daytoy ket senyales ti atake ti puso ken masapul a dagus a maipan iti ospital.
Iti panangliklik iti kasta a sakit, pinalagip ni Dr. Genoveza a masapul a kontrolen ti makan—liklikan ti sobra a pritong, maalat ken nataba. Irekomendarna met ti regular a ehersisyo iti saan a bumaba iti 30 minutos, tallo a beses iti makalawas, ken panagliklik iti sigarilyo ken sobra a arak. Nagsagana met ti publiko para iti selebrasion ti Philippine Heart Month tunggal bulan ti Pebrero tapno mapapigsa ti panakaammo maipapan iti panangsalaknib iti puso ken panagliklik iti sakit a mayannatop iti daytoy.
Source: Cagayan PIO
