Nadiskubre dagiti residente iti Barangay Tanglagan ken Barangay Langnao iti maysa a naiduma a klase ti Tayabak wenno Strongylodon macrobotrys, a kilala met a Jade Vine, iti kabakiran iti lugar. Daytoy a mula ket endemic iti Pilipinas ken maibilang nga endangered gapu iti bassit a bilangna ken sabsabali nga itsura.
Segun iti report, natakuatan dagiti kumpol ti ligaw a Tayabak babaen iti tulong dagiti green guards ken dagiti kameng ti Municipal Environment and Natural Resources Office (MENRO) ken ti lokal a gobyerno. Inusisa da ti lugar tapno masigurado ti kina-salun-at ti mula ken ti aglawlawna.
Ti Tayabak ket kadawyan a masarakan iti kabakiran kas maysa a agkaykayab a mula a adda sabongna a nakabitin ken kasla kuko ti tao ti porma. Ti kulayna ket turquoise ken jade-green, a saan a kadawyan a makita iti sabong. Mabalin a dumakkel ti sabongna agingga iti maysa a metro ti kaatiddogna, isu a mangted iti ad-adu a panagsiddaaw kadagiti nakakita.
Impalawag ti MENRO a ti panagdur-as dagiti Tayabak ket makatulong ti panagpolinasyon dagiti paniki, a narigat aramiden no artipisyal laeng. Daytoy ket pammaneknek met ti nasalun-at ken nadumaduma a ecosystem iti kabakiran ti Calanasan.
Gapu iti daytoy a nadiskubre, inawagan ti MENRO ti publiko a mangipakaammo kadagiti otoridad no adda makitada a sabsabali a mula wenno ayup. Pinagballaaganda met a saan a alaen wenno itanem iti pribado a lugar ti Tayabak tapno maprotektaran ti natural a populasyonna ken masigurado ti panagtultuloy ti panagbiagna iti kabakiran ti Apayao.
Source: Municipality of Calanasan, Apayao
