Inangay ti Philippine Statistics Authority–Regional Statistical Services Office I (PSA-RSSO I) ita nga aldaw, Mayo 13, ti 2025 Labor Force Survey (LFS) idiay J&V Hotel and Resort, San Fernando City, La Union.
Ti aktibidad ket mangurnos ken mangted kadagiti napateg a datos maipanggep iti sosyo-ekonomiko ken demograpiko a kasasaad dagiti tattao, nangruna iti empleyo, awan trabaho, ken underemployment, a mausar a kangrunaan nga indikador iti panangusisa iti kasasaad ti trabaho ken ekonomia iti pagilian.
Naangay met daytoy a kasabay ti April 2026 Inflation Press Conference a mangipaay kadagiti kabaruan maipanggep iti inflation iti rehion ken dadduma pay a kasasaad ti ekonomia. Babaen daytoy, maipaammo kadagiti policymakers, stakeholders, ken publiko ti agdama a sitwasyon ti ekonomia idiay Region 1.
Babaen kadagitoy nga inisyatibo, itultuloy ti PSA-RSSO I ti panangpapigsa iti data-driven governance babaen iti panangipaay kadagiti umiso, napapanahon, ken mapagtalkan a estadistika a makatulong iti nasayaat ken naibatay iti datos a panangaramid kadagiti desisyon para iti panagdur-as ti nasyon.
Source: PIA Ilocos Region
