SAN FERNANDO CITY, La Union — Nakaawat iti cash aid dagiti jeepney drivers iti probinsya ti La Union babaen iti Cash Relief Assistance (CRA) program ti Department of Social Welfare and Development idi Mierkoles, Mayo 13.
Naorganisar ti pannakaited ti tulong babaen iti panagtitinulong ti Land Transportation Franchising and Regulatory Board wenno LTFRB-La Union.
Umuna daytoy a pannakaited ti cash aid kadagiti jeepney drivers kalpasan a nagipakaammo ti DSWD Field Office 1 idi Mayo 12 a nakaawat danen ti tulong ti 22,210 a kameng ti Tricycle Operators and Drivers Association (TODA) iti 38 a local government units (LGUs) iti intero nga Ilocos Region babaen iti CRA program.
Nagtallinaed iti nasurok a P101 milyon ti total a naipayout iti DSWD CRA agingga iti daytoy nga oras.
Sigun iti DSWD Field Office 1, agtultuloy pay dagiti kapada a payout para kadagiti jeepney drivers iti dadduma pay a probinsya iti Ilocos Region kadagiti sumaruno nga aldaw. (CCMT)
Source: PIA Ilocos Region
