Nangidaulo ti Land Transportation Office (LTO) Region I iti sabay-sabay a panangidaos ti Theoretical Driving Course (TDC) idiay nadumaduma a district offices iti rehion idi March 7–8, 2026 kas paset ti panangselebrar ti National Women’s Month.
Iti panangipangulo ni Regional Director Glorioso Daniel Z. Martinez ken Assistant Regional Director Eric C. Suriben, naited ti libre a TDC kadagiti sumagmamano a partisipante manipud iti nadumaduma a komunidad. Iti kurso, naisuro dagiti kangrunaan a pagalagadan iti kalsada, road signs, responsableng panagmaneho ken panangsalaknib iti kalsada.
Segun iti LTO Region I, ti programa ket mangsuporta iti pannakapalig-on dagiti babai babaen iti panangited kadakuada iti kaammoan ken abilidad a makatulong iti natalged ken responsableng panagusar iti kalsada. Naipakita met iti daytoy ti komitment ti opisina iti inklusibo a panagserbi iti publiko ken panangitag-ay iti gunglo dagiti babai iti sosiedad.
Source: LTO Region 1 Drive Better to Enjoy Safe Travel
