Imbaga nen Alaminos City Mayor Arth Bryan Celeste so nagkalalon aktibidad tan programa na inlunsad na pamayalbaley ed okasyon na Hundred Islands Festival ed panayam na ginawa ed programang “Pantongtongan Tayo” idi Marso 6, 2026.
Ayon ki Mayor Celeste, so selebrasyon et pakay na ipanengneng tan ipabitar so nagkalalon lokal a produkto tan kayarian na syudad, a singa so kilalang Alaminos Longganisa a tampok ed aktibidad a Longganisa Ihaw-Ihaw idi met la Marso 6. Inkuan to ya patuloy a susuportaan na lokal a gobyerno so saray inisyatiba a makatulong ed panpaunlad na turismo tan kabuhayan na saray residente.
Tinalakay met nen Celeste so arum nin importanteng programa na syudad a singa so Gawad Sandaang Pulo Award, a mangipapateg tan mangbibigay rekognisyon ed saray natatanging indibidwal tan organisasyon ed komunidad. Kabilang met ed saray proyekto so itatayo a Dairy Box Facility a pakay na palakasin so industriya na dairy carabao ed syudad tan mangiter nin dagdag a pangkabuhayan ed saray mannalon.
Inlawlaw met nen Celeste so pagtatayo na Alaminos City Colleges, a mangipangiter nin abot-kayang anggap tan de-kalidad a edukasyon ed saray kabataan a Alaminosnon pian mas mapabaleg so oportunidad da ed masanton a panaon.
Inkuan na alkalde ya tuloy-tuloy so panlunsad na pamahalaang syudad ed saray programa a mangpapabiskeg ed ekonomiya, turismo tan serbisyong panlipunan para ed kapakanan na saray taga-Alaminos.
Source: PIA Pangasinan
