Agsapsapul ti Sangguniang Panlalawigan ti Benguet iti suporta ni Benguet lawmaker Eric G. Yap tapno isponsoranna ti maysa a linteg a mangireklasipikar kadagiti dadduma a forest lands iti probinsia, tapno maipakita ti pudno ken nabayag a panagaramat kadagitoy a daga.
Segun iti Proposed Resolution No. SP12-R-056, daytoy a panukala ket mangpabaro kadagiti klasipikasion ti daga, nangruna kadagiti luglugar a nabayag a nagbalinen a pagnaedan, pagmulaan, pagnegosio ken sentro ti komunidad. Kayatna a maipantay ti legal a klasipikasion iti agdama a kasasaad iti daga.
Nakaipunto met iti resolusion ti panagkasapulan a mareklasipikar dagiti forest lands tapno makaaladag iti dokumento ti kinaikukua dagiti Indigenous Cultural Communities ken Indigenous Peoples (ICCs/IPs) iti dagiti daga a naokupan ken namatmatanda manipud pay idi.
Inlawlawag ti resolusion nga adu a paset ti Benguet ket maibilang pay laeng a forest land iti linteg, uray pay nabayag a nairamanan ti panagnaed ken panagdebelop. Gapuna, adu dagiti ICCs/IPs a saan a makaalan iti titulo, tax declaration ken dadduma pay a legal a papeles, nga isu a mangikabil kadakuada iti peligro ti panagsusuppiat iti daga ken manglimitar iti panagakses kadagiti serbisio ken programa ti gobyerno.
Impaganetget da Board Members Ruben L. Tinda-an, Jim G. Botiwey ken IPMR Benjamin G. Palbusa nga ti panagurnos iti klasipikasion ti daga ket mangbigbig iti pakasaritaan ti panagaramat, mangpasayaat iti social justice, mangsalaknib iti ancestral rights ken mangsuporta iti nasayaat ken agtultuloy a panagdebelop iti Benguet.
Ti panukala a resolusion ket naituloy iti Committees on Indigenous Cultural Communities and Indigenous Peoples Affairs ken Land Use and Housing tapno ad-adda a masukimat.
