Opisialen a nabuklan iti publiko ti Camalaniugan–Aparri Bridge kalpasan ti panaglukat a indauluan ni Presidente Ferdinand “Bongbong” Marcos Jr. idi Huwebes, Enero 8, 2026.
Kaduan ti presidente iti panagbisita iti Cagayan ni DPWH Secretary Vince Dizon tapno mangasiwa iti panagpasingay ti proyekto. Napudut a sinangaili da ni Gobernador Edgar “Manong Egay” Aglipay, Bise Gobernador Manuel Mamba, ken dagiti dadduma pay a lokal nga opisial.
Nangrugi ti programa iti panagbasbas iti tulay, a pinasarunuan ti opisial nga unveiling of markings iti pannakairamanan da Aparri Mayor Dominador Dayag ken Camalaniugan Mayor Isidro Cabaddu, kadua dagiti opisial ti lokal a gobyerno.
Iti mensahe na, impannakkel ni Presidente Marcos ti naurnos ken natalged a pannakabukel ti tulay nga isu a mangted iti dakkel a benepisio kadagiti residente ken biyahero. Kinuna na nga agbalin a napardas ti panagbiyahe iti nagbaetan ti Camalaniugan ken Aparri ken mapadur-as pay ti komersio ken aktibidad ekonomiko iti probinsia.
Agyaman met ti presidente iti DPWH iti panangidaulo ni Sec. Dizon gapu ta nalpas ti proyekto uray adda dagiti rigat, ken nabuklan daytoy iti umiso a tiempo ken pondo.
“Nakakatuwa dahil napakalaking bagay ang paglalagay ng ganitong tulay dahil it cuts the travel time imbes na umiikot ng napakalayo para tumawid ay andito na ang Camalaniugan Bridge. I congratulate the Public Works for their very good work here and to see that everything was completed on time, on budget, and despite all of the other issues that we are having to deal with – patuloy pa rin ang kanilang naging trabaho,” kinuna ni Presidente Marcos.
Segun kadagiti datos, lumabes iti Php2 bilyon ti pondo a naited iti proyekto a nangrugi idi Mayo 2020. Ti tulay ket addaan iti kabuuan a 2.16 kilometro a kaatiddog ken 45 tons a maximum load capacity. Babaen iti pannakabukel daytoy, mababain iti agarup 20 minutos ti biyahe a dati nga umabot iti asideg maysa nga oras babaen ti Magapit Bridge.
Nakitugot met iti okasion dagiti opisial ti DPWH Region II a pinangulohan ni Regional Director Mathias Malenab, ni Unang Ginang Marinette Yan-Aglipay, ni Atty. Mabel Villarica-Mamba, dagiti alkalde manipud kadagiti nadumaduma a munisipalidad, ken dadduma pay a bisita.
