Naipasidong iti load testing idi Enero 5, 2026 ti Aparri–Camalaniugan Mega Bridge kas panagsagana sakbay a pormal a malukatan iti publiko ken dagiti motorista.
Segun kenni DPWH Regional Director Engr. Mathias Malenab, napateg ti load testing tapno masigurado ti pigsa ken seguridad ti tulay sakbay a mausar. Ti panagsukimat ket indauluan ti project contractor a Hunan Road and Bridge Construction Co., Ltd., Philippine Branch.
Iti load testing, walo a 10-wheeler truck a naikarga iti graba ken bato ti nagsabay-sabay a lumasat iti rangtay. Tunggal truck ket adda 40 tonelada ti kinadagsenna. Nagaramat met da iti sensor devices tapno masukat no kaya ti rangtay ti dagsen ken panaggaraw dagiti lugan.
“Ito ay bagong gawa, through the initiative of the contractor, maliban sa design at construction isinama rin nila yung load test doon, so hindi po ito karaniwan na ginagawa sa mga tulay,” kinuna ni Engr. Malenab.
Inlawlawag met ni Engr. Malenab a malukatan ti Aparri–Camalaniugan Bridge nu Enero 8, kalpasan ti pormal a panagpasinaya, ken mabalinen a pagnaan ti amin a klasen ti lugan.
Ti rangtay, a 2.16 kilometro ti kabayagna ken adda 45 tonelada ti maximum load capacity, ket napateg a proyekto a mangtulong iti biyahe ken panagbiag dagiti umili iti umuna ken maikadua a distrito ti Cagayan.
