Idi bigat ti Disyembre 19, 2025, saan a ninamnama dagiti tropa ti 501st Infantry (Valiant) Brigade ti Philippine Army a makabakbakan dagiti miyembro ti Regional Guerrilla Unit (RGU) a sakup ti Ilocos Cordillera Regional Committee (ICRC) idiay Sitio Tacdangan, Barangay Abang, Bucay, Abra.
Segun iti impormasion a naawat manipud kadagiti residente iti lugar, nadiskubre dagiti sundalo ti 77th Infantry (Don’t Dare) Battalion ti maysa a paglemmengan dagiti armado. Daytoy ti nangrugi ti bakbakan a nagbayag laeng iti agarup tallo a minuto sakbay a nagguwar ken nagtalaw dagiti RGU–ICRC.
Kalpasan ti panagbakbakan, nasarakan dagiti sundalo ti maysa a naiwala a kampo dagiti armado a naglaon kadagiti personal a gamit ken suplay ti kanen.
Maysa a sundalo ti 77th Infantry Battalion ti nadangran iti bakbakan ken dagus a naevacuate babaen iti eroplano. Naawatan isuna iti umuna a panagagas idiay Abra Provincial Hospital ken naiyakar kalpasanna idiay Mariano Marcos Memorial Hospital idiay Batac City, Ilocos Norte, tapno maipatuloy ti panagagasna.
Inyebkas ti kumander ti 501st Infantry Brigade ti panangpategna iti kina-propesional dagiti tropa. Binalakadan na pay dagiti nabati a miyembro ti RGU–ICRC a sumuko ken agavail kadagiti programa ti gobyerno para iti kapia ken amnestiya.
Agpatpatuloy ti 501st Infantry Brigade iti panagsubaybay ken panagpursige tapno mapagtalinaed ti talged, kapia, ken panagdur-as iti probinsia ti Abra.
