Tallo nga agtutubu manipud Kalinga ti nangipakita iti kinagaget ken kinalaing da iti Philippine Coast Guard (PCG) kalpasan nga nag-graduate da a kas Top 10 iti klase da idiay Regional Training Center iti Aurora Province.
Dagitoy ket da ASN Richmond E. Fernando, Top 4; ASN James Vandame M. Daus, Top 5; ken ASN Melvin Neil B. Banggolay, Top 9, amin manipud Tabuk City ken kameng ti PCG Class 113 “NASIGLAT-SALAKNIB.”
Kalpasan da nga nagraduar, nag-courtesy visit dagiti tallo, kadua dagiti kakabsatda ken dagiti sabali pay nga iKalinga nga kameng ti PCG Class 114 “SANGKADALIGTAN,” iti Opisina ni Governor James Edduba idi Disyembre 18.
Imbinglay ni Fernando nga saana nga napanunut a mapasrek isuna iti Top 4. Kinunana, “My family inspired me, because their sacrifices and support remind me why I must stay strong and disciplined.” Adda met kenkuana ti MARINA license ken dean’s lister isuna idi nag-adal iti Marine Engineering.
Ni Daus met, kinunana a ti anakna a 11 bulan ti nangtulak kenkuana a mangibtor iti amin a kabaelanna. Kinunana a ti pamilyana ti inspirasyonna tapno agtultuloy iti training ken mangipaay iti nasayaat a masakbayan iti anakna. “Familyk ken diay anak ko iti nang-inspire kanyak. Is-isipek, nu ag-give up nak, awan ited ko kasla kuma nga future na, nga mangpa-uskwela kanyana,” kinunana.
Ni Banggolay met, inlawlawagna nga maminsan a nag-apply isuna iti PCG idi 2022 ngem saan a naawat. Nag-apply manen isuna idi 2024 ket kaasin ti Apu ket naawat. Inallukoyna dagiti agtarigagay a sumrek iti uniformed service a saan a mapukaw iti namnama no saan da pay a naawat iti umuna.
“Nu in case man nga nag-apply kayo naminsan tapos haan kayo naala, haan kayo maawanan iti pag-asa wenno madismaya. Habang adda pagkakataon, try and try latta kasi haan met agpapada ti kwa. Nu man naala diay kadwam tapos sika iti haan nga naala, haan ka nga madismaya kasi adda iti sarili nga linya iti biyag; haan nga agpapada iti gasat,” kinunan ni Banggolay.
Dagiti nagun-od dagitoy nga tallo a anak ti Kalinga ket mangipakita a babaen iti gaget, disiplina, ken panagtalek iti sarili ken pamilya ket adda ti gundaway a maragpat ti balligi.
Source: Guru Press Cordillera
