Itinanghal na pinakamahusay ang 5th Infantry Division Philippine Army sa lahat ng major units ng Philippine Army sa buong bansa kasunod ng isinagawang Annual General Inspection (AGI) 2023.
Ayon sa 5ID PA, ang naturang parangal ay kasunod ng pagpapatupad ng dekalidad na serbisyo at pagiging disiplinado ng dibisyon.
Nanguna ang 5th ID sa AGI na nakakuha ng gradong 94.5 percent na sinundan ng 6th ID na 94.2 percent na grado at 93.9 percent na grado naman ang 4th ID.
Nabatid na ang AGI ay isang sukatan para malaman kung naisakatuparan ng mga unit ng Army ang kanilang misyon gamit ang maaayos at dekalidad na proseso at sistema.
Kaugnay rito, labis ang pasasalamat ni 5ID Commander MGen. Audrey Pasia sa naturang parangal at tiniyak na lalo pa nilang paiigtingin ang kanilang pagsisikap para makapagbigay ng magandang serbisyo sa mamamayan.
Source : 5th Infantry Division, Philippine Army
