Pormal a linunsad idi Miyerkules, Setyembre 9, 2026, iti Cagayan ti programang “Benteng Bigas Meron Na!”, maysa nga inisyatiba ti administrasyon ni Pangulong Ferdinand “Bongbong” Marcos Jr. a mangipaay iti abot-kayang bigas kadagiti nadumaduma a sektor ti komunidad. Kabilang kadagiti umuna a benepisyaryo dagiti teaching ken non-teaching personnel iti Tuguegarao City ken dagiti karatig-bayan, kasta met dagiti miembro ti media iti probinsia a nakapagparehistro iti programa.
Sinaksian ni Gobernador Edgar Aglipay ti panangilunsad ken panaglakò ti benteng bigas. Iti mensahena, pinagyamanan na ti Department of Agriculture Regional Field Office 2 (DA-RFO 2), National Food Authority (NFA), ken Food Terminal Inc. (FTI) iti pannakaipatumpal ti programa iti Cagayan. Kinunana a dakkel a tulong daytoy kadagiti sektor ti edukasion ken media iti panangpababa ti gastusda iti taraon, bayat a makatulong met iti panangsuporta iti lokal a produksion ti bagas.
Impatpateg ni Atty. Oliver Y. Dicdican, Vice President for Corporate Affairs ti FTI, a mapagtalinaed ti programa tapno maipaay met iti sabali pay a vulnerable sectors iti Lambak Cagayan, agraman dagiti senior citizen, solo parent, PWD, benepisyaryo ti 4Ps, mannalon, farmworker, mangngalap, jeepney ken tricycle driver, ken minimum wage earner. Kabilang kadagiti kangrunaan a benepisyaryo dagiti mannalon ken farmworker a rehistrado iti RSBSA ken agmula iti dua nga ektarya wenno nababbaba. Masapul laeng a mangiparangda iti Intervention Monitoring Card (IMC) wenno valid ID.
Iti umuna a rollout, mapagpagarup a maipaglako ti agarup 400 a sako wenno 20 metric tons a bagas para iti nasurok 800 a benepisyaryo. Tunggal benepisyaryo ket mabalin a gumatang iti agingga iti 10 kilo a bigas iti presyo a P20 kada kilo. Mabalin met a gumatang iti agingga iti 30 kilo kada bulan agingga Disyembre, wenno maysa a sako a 50 kilo kas lump-sum allocation para iti lima a bulan.
Naidauloan ti programa ti DA-RFO 2, NFA, FTI, ken Provincial Government of Cagayan (PGC) babaen iti Office of the Provincial Agriculturist (OPA). Kaduana met ti Kadiwa ng Pangulo tapno maiparang ken mailako dagiti produkto dagiti lokal a mannalon, mangngalap, ken babassit a negosyante iti probinsia.
