MT. PROVINCE – Pimmusay ti innem bayat a nadangran ti 17 nga indibidual kalpasan a natnag ti nagluganan dagitoy nga Elf truck iti Talubin-Barlig road, partikular iti Sitio Jakap, Talubin, Bontoc Mt. Province idi Martes, September 15, 2026.
Karaman kadagiti pimmusay ti 4-5 months a maladaga, uppat a babbae ken maysa a lalaki.
Iti exclusive a pannakiuman ti Bombo Radyo kenni Police Major Robert B. Sagandoy, Chief of Police ti Bontoc Municipal Police Station (MPS), kinunana a posible nga agkakabagyan amin dagiti biktima a manipud sadiay Bakun, Benguet
Iti inisyal nga imbestigasyon dagiti otoridad, nagtaud dagiti biktima sadiay Isabela ken paturong dagitoy idiay Bakun idi natnag ti nagtuganan dagitoy iti mapattapatta a 100 meters ti kaunegna a rangkes.
Napasamak ti insidente pasado 12:40 p.m ita nga aldaw.
Sigun kenni PMajor Sagandoy, agpatpattaming dagiti biktima iti Botoc General Hospital bayat a maur-uray dagiti maseknan a pamilya para iti pannakaiyawid dagiti bangkay.
Agtultuloy ti imbestigasyon dagiti otoridad iti rason ti pannakatnag ti nasao a lugan.
Kabayatanna, kiniddaw ni PMajor. Sangandoy a saan maipablaak ti naganda dagiti biktima para iti privacy dagitoy.
Source: Bombo Radyo Baguio
