Nabigbig ti bangkay a napuoran idiay liblib a paset ti Purok 5 Dayog, Brgy. Madiangat, Quezon, Nueva Vizcaya idi bigat ti February 12, 2026, kalpasan a nakita kadagiti kapamilya na. Segun iti inisyal a report ti Quezon PNP, nadiskubre ti bangkay babaen iti tulong ti maysa a aso a nauna a nakaam-ammo iti madi a banglo iti lugar.
Segun iti salaysay, maysa a ag-asawa ti nagna idiay lugar idi napadasan ti asoda ti saan a nasayaat nga angut ket sinurotna daytoy. Idi sinurot met ti ag-asawa ti asoda, nasarakanda ti napuoran a bangkay ti maysa a babai. Dagusda nga impakaammo iti Kapitan, nga isu met ti nangipasa ti report iti PNP tapno maipatungpal ti napartak a panagresponde.
Dagus a nagresponde ti PNP kadua ti forensic unit, a nangala iti hair follicle, footprint ken DNA sample tapno makatulong iti imbestigasyon. Napalabas ti maysa nga oras, dimteng ti maysa a tricycle driver ken maysa nga estudyante tapno bigbigen ti bangkay. Ditoy a nakumpirma nga ti biktima ket anak ti tricycle driver ken gayyem met ti estudyante.
Nailasin ti biktima babaen iti insuotna a pantalon, sapatos ken medyas, a maikeddeng iti maysa a 19-anyos a residente ti Brgy. Madiangat. Isu ket maikadua a tawen nga estudyante iti Bachelor of Science in Tourism Management idiay Nueva Vizcaya State University. Nagpaay met ti unibersidad iti pakikiramay ken nangiparangarang iti pannakakondenar iti krimen, kas kadagiti nadumaduma a departamento nga nangawag iti hustisya para iti estudyanteda.
Iti agdama, agtultuloy ti naun-uneg ken naurnos nga imbestigasyon ti pulisya tapno maammoan ti pudno a rason ken dagiti responsabli iti krimen. Impatalged ti PNP nga aramidenna amin a kabaelan tapno maipaay ti hustisya iti biktima ken iti pamilyana.
Source: DWRV1233.Official
