Naangay iti probinsya ti Kalinga ti Provincial Convention ti Men Opposed to Violence Against Women Everywhere (MOVE) idi Pebrero 10, 2026. Ti aktibidad ket nagtipon kadagiti lider ken miyembro ti MOVE tapno mapapigsa pay ti kampanya kontra karahasan a maiparangarang kadagiti babbai ken ubbing (VAWC). Iniggeman daytoy ni G. George A. Ban-os, Presidente ti MOVE Kalinga, iti pannakikadua ti Provincial Social Welfare and Development Office (PSWDO) a pangulowan ni Gng. Rosemaritez Oyawon.
Immuna a nakipasit dagiti MOVE clusters manipud Kalinga State University (KSU), Siyudad ti Tabuk, Philippine National Police (PNP), Provincial Local Government Unit (PLGU) ti Kalinga, ken dagiti LGU ti Rizal, Pinukpuk ken Lubuagan. Nakipagpaset met ni Gobernador James S. Edduba ken Board Member Emilio Kitongan a nangipakita iti naan-anay a suporta da iti adbokasiya ti MOVE.
Iti mensahe ti pananglukatna, impaganetget ni Ban-os ti kinapateg ti panagkaykaysa ken panagtinnulong tapno masursuro ken maibingay dagiti naimbag a gawi iti panangsalaknib kadagiti babbai, ubbing ken sabali pay a nakapuy a sektor. Kinuna na a ti kumbension ket lugar ti panagadal ken panagurnos kadagiti programa a mangpabileg iti komunidad.
Impakaammo ni Board Member Kitongan iti mensahe ti pannakikomit na a ti MOVE ket napigsa a katuwang iti panangipatungpal ti Republic Act 9262 wenno Anti-VAWC Law. Impasigurado na a ti Sangguniang Panlalawigan ket nakasagana a mangipasa kadagiti resolusion wenno ordinansa tapno mapapigsa pay ti proteksion kadagiti babbai ken ubbing iti probinsya.
Iti mensahe ti suporta na, inbigbig ni Gobernador Edduba ti liderato ni Ban-os ken ti aktibo a pannakipagpaset dagiti clusters. Impaganetget na a ti Kalinga ket natalna ken progresibo a probinsya, ken ti gobyerno probinsial ket agtultuloy a mangsuporta iti panangipasdek kadagiti inisyatibo ti MOVE. Babaen iti representante ni Bise Gobernador Atty. Dave Odiem, naipakaammo a saan a lugar ti karahasan kadagiti babbai iti Kalinga, a nakabatay iti kultura ti bodong a mangitag-ay iti respeto ken panangsalaknib kadagiti nakapuy.
Adda met kadagiti aktibidad ti Retro Dance Remix ken Live Band Competition a pinasetan dagiti clusters, a nangparagsak ken nangpapigsa iti panagkakadua. Maysa kadagiti kangrunaan a paset ti programa ket ti Orientation iti Safe Spaces Act (RA 11313) nga inisuro ni Atty. Brandon B. Dangatang ti KSU-MOVE, a nangpakaammo maipanggep iti “Bawal Bastos Law” ken ti panangliklik kadagiti anyaman a porma ti sexual harassment. Nagbanag ti kumbension iti napapigsa a pannakikaykaysa ken baro a komitment para iti natalna, natalged, ken awan-karahasan a Kalinga para kadagiti amin.
Source: Province of Kalinga
