Bilang pakikiisa sa pagdiriwang ng Healthy Aging Awareness Month, pinangunahan ng Pamahalaang Lungsod ng Laoag sa pamumuno ni Hon. Bryan James Alcid, Punong Lungsod, kasama si Hon. Roque Benjamin “RB” C. Ablan, Pangulo ng Liga ng mga Barangay, ang isang Feeding Program na naglalayong magbigay ng masustansyang pagkain para sa mga kabataan at iba pang maralitang kasapi ng komunidad.
Ang programa ay naisakatuparan sa pakikipagtulungan ng Laoag City Police Station sa pangunguna ni PLtCol Andrew P. Rabang. Ipinapakita nito ang malasakit ng Philippine National Police hindi lamang sa pagpapanatili ng kapayapaan at kaayusan, kundi maging sa pagsusulong ng kalusugan, kabutihang panlipunan, at pananagutang pangkomunidad.
Binanggit ni Mayor Alcid na ang aktibidad ay sumasalamin sa layunin ng pamahalaang lungsod na mapabuti ang kalidad ng buhay ng mga mamamayan, lalo na ng mga higit na nangangailangan. “Sa pagtutulungan ng ating mga barangay at kapulisan, naipapakita natin ang tunay na malasakit at suporta sa ating mga kababayan, lalo na sa kabataan at mga mahihina,” ani niya.
Ang naturang aktibidad ay patunay ng iisang hangarin ng pamahalaang lungsod at ng PNP na makalikha ng isang mas ligtas, mas malusog, at mas mapagmalasakit na komunidad para sa lahat.
Source: Laoag City Police Station
