Ti Philippine Sports Commission (PSC) ket nangipaay iti Php20 million a suporta iti City Government of Baguio para kadagiti sports development program. Impakaammo ni PSC Chairman John Patrick “Pato” Gregorio daytoy idi flag-raising idiay City Hall.
Kinuna ni PSC Chairman Gregorio a ti suporta ket saan laeng a tulong, no di ket pannakabigbig iti napigsa a panangipangato ti Baguio iti sports programs. Kinapudnona, impakita ti siyudad ti panangisuro ken panangsuporta iti atleta ken nagbalin a ehemplo para kadagiti dadduma a local government units iti pagilian.
Naipaay ti tseke ken ni Mayor Benjamin Magalong kas paset ti programa. Naipaay met dagiti basketballs a maipamagi kadagiti barangay ti siyudad tapno mapabileg pay ti partisipasyon ti umili iti sports activities.
Kinuna pay ti PSC Chairman a ti Baguio ket maysa a “transformative city” gapu iti napigsa a liderato ken determinasyon dagiti mangidaulo iti pannakapauneg ti komunidad. Kinunana a ti suporta ti PSC ket agpaay iti panangpabileg kadagiti athletic programs ken panangipangato iti papel ti Baguio kas sentro ti sports tourism.
Bayat ti panangpapigsa ti PSC iti sports development iti intero a pagilian, ipatpateg ti ahensya ti pannakaitayo dagiti regional training centers ken sports facilities tapno matulongan a maipangato dagiti masakbayan nga atleta ken potensyal nga Olympians. Daytoy ket paset ti panangipatungpal iti ad-adu pay a serbisyo para iti publiko ken pannakapabileg ti sports iti Pilipinas.
Source: Baguio City PIO
