Opisyal nga inlunsad ti Baguio City ti Panagbenga wenno Baguio Flower Festival 2026 kalpasan ti flag-raising ceremony idi Enero 12, 2026, idiay Baguio City Hall grounds.
Indauluan ti city government ken ti Baguio Flower Festival Foundation Inc. (BFFFI) ti panaglunsad, a nangiparangarang iti lineup dagiti aktibidad para iti ika-30 a anibersaryo ti pistaan. Ti tema tatta a tawen ket “Blooming without end,” a mangipakita ti tallo a dekada ti panagtitinulong dagiti umili, ti BFFFI, ken ti lokal a gobyerno.
Segun kenni Vice Mayor Faustino Olowan, ti Panagbenga ket naiparangarang iti napintas a kultura, identidad, ken panagdayaw ti Baguio, ken nagserbi met a pagtaengan dagiti panggedan a pagbiagan. Imbaga na a ti pistaan ket mangted gundaway kadagiti lokal nga negosyo, artists, eskuelaan, ken dagiti agtutubo tapno agdur-as ken “agsabong.”
Imbinglay Bise Alkalde a ti kinatalged ken kinalinis ti publiko a lugar, nasayaat a traffic ken crowd management, responsable nga panangsalimetmet iti basura, ken panangipateg iti aglawlaw ket isu dagiti kangrunaan a batayan ti balligi ti selebrasion.
Imbaga met ni Mayor Benjamin Magalong a ti Panagbenga ket simbolo ti panagdakkel, panagpabaro, ken panagdur-as ti siudad uray adda dagiti karit. Inawis na ti publiko nga makipagrambak iti kultura ti Baguio iti las-ud ti pistaan.
Nangrugi ti Panagbenga idi 1996, kalpasan ti makadadael a ginggined a nangapektar iti Baguio ken dadduma a paset ti Northern Luzon. Pinagpanunotan daytoy ni Professor Damaso Bangaoet Jr. tapno pabangunen manen ti turismo ken ekonomia ti siudad.
Segun kenni BFFFI “Chairman for Life” ken Baguio Congressman Mauricio Domogan, kas iti panagdakkel ti global a panangbigbig iti Panagbenga, masapul a saan a malipat ti nagrugianna a pakasaritaan.
Ti opisyal a panaglukat ti Panagbenga 2026 ket iti Pebrero 1, agraman ti opening parade. Kadagiti kangrunaan a highlights ket Grand Street Dancing Parade nu Pebrero 28 ken ti Grand Float Parade iti Marso 1, 2026.
