San Fernando City, La Union — Noong September 7, 2025, nagtipon-tipon ang iba’t ibang ahensya ng pamahalaang nasyonal at mga lokal na pamahalaan sa La Union sa Poro Point Baywalk upang pormal na buksan ang pagdiriwang ng Civil Service Month 2025.
Sinimulan ang programa sa pamamagitan ng isang fun run na ginanap bago sumikat ang araw, kasunod ang masiglang zumba session sa baybayin na nilahukan ng daan-daang kawani ng pamahalaan, empleyado, at mga miyembro ng komunidad.
Higit pa sa pisikal na aktibidad, binigyang-diin ng pagdiriwang ang temang nakatuon sa pagkakaisa, kalusugan, at tapat na paglilingkod-bayan. Paalala rin ito sa mga lingkod-bayan na ang pangangalaga sa sariling kalusugan ay mahalagang bahagi ng kanilang kakayahang magpatuloy sa tapat na paglilingkod sa sambayanang Pilipino.
Source: Civil Service Commission Regional Office 1
