LAOAG CITY – Inyistoria ti saanen a nagpabigbig pay a maysa nga Overseas Filipino Worker a residente ditoy siudad ti Laoag a simmangpet manipud iti Middle East ti nagbalin a padasna iti baet ti gubat.
Segun kenkuana, arig saanda a makatalna ken makaturog gapu iti amakda kadagiti maiwaywayat a drone strike iti lugarda.
Inbatadna a tunggal adda dagiti maiwayat a drone strike ket ag-alarm ti cellphone-da a mangipasimudaag a masapul ti panagruarda tapno mapan iti nataltalged a lugar.
Inlawlawagna nga apaman ti panagturongda iti pagtrabtrabahoanda a maysa a planta ket kellaat a napabettakan ti drone strike.
Gapu iti daytoy, kunana a nagdesision isuna nga agawid lattan ditoy pagilian tapno maliklikan a mairisgo ti biagna.
Nupay kasta, inpettengna a no addanto pay ti oportunidad a makasubli isuna iti Saudi Arabia ket saan daytoy nga agpangadua nga agsubli gapu iti kinarigat ti panagbiag ditoy Pilipinas.
Innayonna nga agarup tallo a tawen a nagtrabaho iti ballasiw taaw no sadinno nga agsusueldo daytoy ti 40 a ribu a pisos iti kada bulan banag a saanna a mabirukan ditoy pagilian.
Maipalagip a natalged a nakasangpet ti uppat nga Overseas Filipino Workers a residente ditoy siudad ti Laoag manipud idiay United Arab Emirates, Kuwait, Kingdom of Saudi Arabia ken Israel.
Source: Bombo Radyo Laoag
