Baguio City – Agtultuloy ti monitoring nga ipatpatungpal ti Department of Tourism Cordillera kadagiti tourist destinations a nakaro a naapektaran gapu iti panagtudtudo na gapu iti epekto ti Habagat.
Sigun kenni DOT Cordillera Regional Director Jovi Ganongan, ipangpangruna da iti agdama ti kinatalged dagiti turista ken bisita nga agturturong kadagiti kangrunaan a pagpasyaran babaen iti koordinasyon nga ipatpatungpal da kadagiti nagduduma a local government units.
Innayon na pay a kasapulan ti napartak a pannakaiwaragawag dagiti pakdaar dagiti lokal nga opisyales seknan iti kasasaad dagiti tourist destinations kadagiti lugar da tapno mapaka-amuan dagiti agpangpanggep a bisita nga agpasyar ditoy.
Gapu iti agtultuloy a saan a nasayaat a paniempo ket dakkel a risgo ti posibli a sanguen dagiti turista nga agturong kadagiti trekking activities kas iti panagkalay-at kadagiti bantay, panagturong kadagiti water falls ken dadduma pay.
Inaklon pay ti opisyal a naapektaran dagiti kangrunaan a tourism activities gapu iti tinawen a panagtutudo rason nu apay a kasapulan nga agbirok ti alternatibo wenno sabali nga aktibidad dagiti local goventment units a maka-allukoy pay iti turista kas kadagiti tourism related indoor activities.
Nupay kasta ket dakkel latta a karit ti sangsanguenti sektor ti turismo gapu ta maysa a manglaplapped kadagiti bisita nga agturong ditoy Cordillera ket ti sitwasyon dagiti kalsada a makapaspasar ti panagreggaay ti daga ken bato.
Source: Bombo Radyo Baguio
