Nagduduma a grocery items, solar light, ken dadduma pay a tulong ti indanun dagiti kameng ti 101st Maneuver Company, Regional Mobile Force Battalion 1 iti benepisyaryo a residente iti Brgy. Manalpac iti ili ti Solsona. Nabigbig ti benepisyaryo a ni Lola Laura Benito Banglay Buccac a residente iti nasao a lugar.
Segun ti 101st MC, saan a malagipen ni Lola Laura ti edad na, ngem iti kinabaket na ket nagtalinaed ti kinagaget ken kinalaing na nga aglaga ti kawayan nga agbalin a basket, laga ken bigao.
Iti panangidaulo ni PLt Bienesto Fidel Junio, platoon leader kadua na dagiti tropa ti Solsona-Calanasan RBCP, iti kanayon a panagjogging dagiti pulis iti nasao a lugar ket naam-ammo da ni Lola Laura.
Naamuan pay manipud iti 101st MC a kadkadua ni Lola Laura ti anak na a ni Monching Buccac, a tumultulong kenkuana no makaawid manipud iti trabaho kax construction worker.
Naklaat pay ti tropa idi naamuan da a sag-200 agingga iti 300 a pisos ti paglako ti baket kadagiti aramid na a basket, laga ken bigao iti baet a mabayag ti garaw nan, ken adayo pay manipud iti sentro ti lugar na.
Source: Radyo Pilipinas Laoag
