VIGAN CITY, Ilocos Sur — Binigbig ti Provincial Government of Ilocos Sur dagiti sangapulo ket dua (12) a nabati a beterano ti Ikadua a Gubat ti Lubong iti probinsya, iti panagselebrar ti maika-84 nga Araw ti Kagitingan ken Philippine Veterans Week 2026, ita nga Huwebes, Abril 9.
Kas paset ti panangipateg ken panangdayaw kadagiti nagserbi iti pagilian, naited kadagiti beterano ti plake ti panangbigbig ken tig-P5,000 a cash assistance, kas nailawlawag iti Provincial Ordinance No. 0273, Series of 2025 wenno “Ilocos Sur Veterans Week Celebration Ordinance.”
Ti Gobernador a ni Jeremias Singson mismo ti nangited kadagiti plake ken tulong kadagiti beterano, iti panagtitinulong da iti Philippine Veterans Affairs Office (PVAO) Field Service Office Annex iti Vigan City.
Sakbay ti nasao a seremonia, nangidatag ti sabong dagiti opisyales ti gobyerno ken pribado a sektor iti bantayog ni dating Pangulo Elpidio Quirino iti Plaza Salcedo iti Vigan City, kas simbolo ti pananglagip ken panangdayaw kadagiti bayani ti pagilian.
Source: PIA Ilocos Sur
