Ipakdaar ti Provincial Government ti Kalinga ti opisial a panangirugi ti programana a “Libreng Sakay” inton Lunes, Abril 13, 2026, kas sungbat iti agtultuloy a krisis iti presyo dagiti produktong petrolyo a mangapektar iti publiko.
Sigun kenni Governor James S. Edduba, ti programa ket manggep a mangpalag-an bannog ken baclay dagiti commuter, nangruna dagiti estudiante, empleyado, ken dadduma pay a residente a naapektaran iti panagngato ti presyo ti gasolina. Daytoy ket maysa a konkretong inisyatibo tapno matulungan ti umili iti agdama a sitwasyon.
Iti programa, maysa a probinsial a bus ti mang-operate iti tallo a biyahe iti bigat ken tallo met iti malem. Ti ruta ket manipud iti Kalinga State University–Bulanao Campus agingga iti Provincial Capitol, ken agtuloy iti Dagupan iti sango ti Tabuk City Hall. Adda met ti bus a maipuesto iti nasao a lugar tapno agserbi kadagiti sumrek a pasahero iti panagsubli iti isu met laeng a ruta.
Ti libreng sakay ket magun-od manipud Lunes agingga Biernes, a mangited iti nalaka ken awan bayadna a transportasyon para iti publiko. Kabayatan na, tapno mapapigsa pay ti serbisyong transportasyon, nakagatang iti dua a baro a coaster buses ti probinsial a gobyerno, a naawat daan idiay Capitol Canopy babaen kenni Gobernador Edduba ken dadduma a opisial.
Ti daytoy nga inisyatibo ket mangipakita iti agtultuloy a panagserbi ken panangiprioridad iti kasapulan dagiti tattao, nangruna iti panangsapul iti solusyon kadagiti karit a sangsangoen ti komunidad ita a panawen.
Source: Province of Kalinga FB page
