Balligi ti impatungal ti Fixed Visibility Point Ampucao nga Search and Rescue Operation para iti mapukpukaw a lalaki a senior citizen idiay Ampucao, Itogon kadua dagiti barangay officials ken kabagyan ti mapukpukaw nga indibidual.
Nabigbig daytoy kas Ernesto Macalalay Sr., agtawen iti 80.
Sigun iti pablaak ti anak ni Macalalay, naudi a nakitada ti ama da iti alas-6 ti malem idi Setyembre 5 iti komunidad da idiay Simpa, Ampucao, Itogon.
Immunan a naipakaammo nga addaan ti nasao nga indibidual ti Alzheimer’s disease no sadino posible a nangitunda kenkuana nga aglawlawlaw iti nasao a lugar.
Kabayatan iti operasyon, tinurong dagiti otoridad ti aglawlaw ti komunidad pakairamanan dagiti pathways, creeks, ken dadduma pay a pasdek.
Nasarakan da met ti nasao nga indibidual nga agtugtugaw iti agarup 100 metro manipud iti pagtaengan dagitoy.
Dagos met nga incheck dagiti kameng ti FVP Ampucao kadua dagiti barangay officials ken kabagyan ti indibidual ti kondisyon na.
Nagsagrap ti nasao nga indibidual kadagiti minor a sugat iti muging ken dua a luppo na. Naipaay met a dagos ti first aid kenkuana.
Kalpasan a naipaay iti initial medical attention iti nasao nga indibidual, dagos metlaeng daytoy a naitransport iti natalged a lokasyon para iti kanayunan a medical evaluation.
Balligi met ti nasao nga operasyon babaen iti nagtipon a puersa ti kameng ti Itogon Municipal Station, Barangay officials, ken kabagyan ti biktima.
Source: Bombo Radyo Baguio
