Pormal a naideklara ti probinsia ti Kalinga iti State of Stable Internal Peace and Security (SSIPS) idi May 12, maysa a kangrunaan a milestone iti tuloy-tuloy a panagdur-as ti kapia ken seguridad iti probinsia. Naangay ti seremonia idiay Kalinga Sports Center iti Bulanao, Tabuk City, a pinagtiponan dagiti opisial ti gobierno, militar, ken kapulisan.
Iti okasion, pormal met a naited ti kangrunaan a responsibilidad iti panangsalaknib ti talna ken linteg manipud iti Philippine Army iti Philippine National Police (PNP). Ti ceremonial handover ket pinangulowan da ni Jimrhic Obias ti 103rd Infantry Battalion ken ni Police Colonel Gilbert A. Fati-ig, provincial director ti Kalinga Police Provincial Office.
Segun kadagiti opisial, ti pannakaideklara ti Kalinga iti SSIPS ket mangipakita iti napigsa a panagdur-as ti seguridad iti probinsia. Daytoy ket mangiparangarang iti panagbalbaliw manipud iti operasyon a pinangulowan ti militar agingga iti mas napabileg a papel ti kapulisan iti law enforcement ken community-based peacekeeping.
Immalan met iti okasion ni Anthony C. Nuyda, regional director ti Department of the Interior and Local Government-Cordillera, kas representante ni Interior Secretary Jonvic Remulla. Kasta met a nakiinnayon ni Police Brigadier General Ericson D. Dilag, regional director ti Police Regional Office-Cordillera, a nangipatungpal iti “Talk to Men” iti Kalinga PPO tapno papigsaen ti disiplina ken panagserbi dagiti pulis iti umili.
Idiay mensahe ni PBGen Dilag, impaganetgetna ti napateg a papel ti PNP iti panangsalimetmet ti natalna ken natalged a kasasaad iti lugar a naideklararan iti SSIPS. Kinunana a ti tulong dagiti komunidad, lokal a gobierno, ken security forces ket napateg tapno mapagtalinaed ti kapia ken progreso iti Kalinga.
Naimatang met iti seremonia ti pannakabendision dagiti markers a mangisimbolo kadagiti ili iti Kalinga, ti Siyudad ti Tabuk, ken ti probinsial a gobierno, kas tanda ti panagkaykaysa ken napaut a talna. Dagiti lokal nga opisial, militar, ken kapulisan ket nangipanamnama iti tuloy-tuloy a suporta para iti kinatalged ken panagdur-as ti probinsia.
Pinangulowan ni James S. Edduba ti pledge of commitment ken signing ceremony dagiti stakeholders, a nangipakita iti napigsa a kooperasion dagiti lokal a gobierno, security forces, ken komunidad. Naipaay met dagiti plaques para iti Seal of SSIPS kadagiti munisipalidad ti Kalinga, Siyudad ti Tabuk, probinsial a gobierno, DILG Kalinga, ken Kalinga Police Provincial Office, a pinangulowan ni Major General Gulliver L. Señires ti 5th Infantry Division ti Philippine Army.
Source: Mountain Beacon
