Nakimaymaysa iti opisial a panangilunsad ti “Experience Baggao: A Destination Beyond Imagination” ni Gobernador Edgar “Tatay Egay” Aglipay, a kaduana ti Unang Ginang Marinette Yan-Aglipay, idi Setyembre 6, 2026, iti maudi nga aldaw ti 37th Philippine Travel Mart idiay SMX Convention Center, Pasay City.
Nangrugi ti programa babaen iti cultural performance a nangiparang iti Abaggaoan Festival ti Baggao, Cagayan, a tampok dagiti performers manipud iti St. Joseph College of Baggao. Naiparang met dagiti tourism offerings ti Baggao, agraman dagiti nadumaduma a pasyalan, makan, yamang kultural, ken aktibidad a mabalin a mapasaran dagiti turista, babaen ken Dan Paolo Ramos, Municipal Tourism Officer ti Baggao.
Pinangulowan ni Department of Tourism (DOT) Region 02 Regional Director Troy Alexander Miano ti opisial a panangilunsad, a kaduana ni EnP. Jenifer Junio-Baquiran, Cagayan Provincial Tourism Officer, dagiti personnel ti Cagayan Tourism Office ken DOT Region 02, tourism officers ti Rehiyon Dos, dagiti opisial ti Baggao, ken dadduma pay a Municipal Tourism Officers ti probinsia. Ti “Experience Baggao: A Destination Beyond Imagination” ket isu ti kabaruan a tourism circuit ti Cagayan iti babaen ti “Endless Fun, Cagayan” branding.
Ti pannakailunsad ti tourism circuit ket tapno maiparang ken mapalawa pay ti turismo ti Baggao babaen iti panangipakaammo kadagiti naisangsangayan a destinasyon, kultura, makan, ken aktibidad ti bayan kadagiti turista manipud iti nadumaduma a paset ti pagilian. Ti Philippine Travel Mart ket maysa kadagiti napateg a travel trade exhibition iti pagilian a mangtipon kadagiti rehion, probinsia, tour operators, ken tourism stakeholders para iti panangitag-ay ti industriya ti turismo iti Pilipinas.
Source: Cagayan Provincial Information Office
