Maaddaan iti panagtaripnong ti Ibaloy tribe iti siudad ti Baguio ken dadduma pay nga umili inton Oktubre tapno talantanen dagiti polisia ken linteg nga adda iti epektona iti komunidad.
Sigun kenni Baguio City Councilor Jose Molintas, karaman kadagiti talantanenda ti singasing a baro a Cordillera autonomy bill ken ti maipapan iti Section 78 iti Indigenous Peoples’ Rights Act wenno IPRA.
Panggep iti forum a talantanen ti addang iti Baguio City Council ken National Commission on Indigenous Peoples nga ikkaten ti probision a mangilaklaksid iti Baguio kadagiti proteksion nga ipapaay ti IPRA.
Nupay kasta, kinuna ni Baguio Representative Mauricio Domogan a saan a mabalin a baliwan ti Baguio Charter ti maysa a national law kas iti IPRA.
Imbes kitdi, insingasing ni Molintas nga amyendaran ti modern Baguio Charter tapno nalawag a mabigbig ken masalakniban ti ancestral lands dagiti katutubo iti Baguio.
Iti agdama, dumanon iti 657.9 nga ektarya iti Ibaloy ancestral properties ti bigbigbigen iti gobierno, karaman ti ancestral domain iti Happy Hallow iti uneg iti Camp John Hay.
Agtultuloy met nga isaksakad iti Baguio Ibaloy community ken City Council ti panangikkat iti Section 78, a nabayag a maibilbilang a lapped iti panangbigbig iti ancestral land rights dagitoy.
Source: Bombo Radyo Baguio
