Madama nga agplano ti Baguio City para iti panangipasayangkat ti “decluttering” iti intero a siudad inton Mayo 31, 2026.
Nagtipon dagiti district coordinators manipud kadagiti 128 a barangay iti siudad, kadua da da Konsehal Rocky Aliping ken Betty Lourdes Tabanda, CEPMO Assistant Engr. Marivic Empizo, ken Urban Forestry Management Division in-charge Floro Bastian iti City Hall tapno pagplanuan ti nasao nga aktibidad.
Maangay ti “decluttering yard sale” manipud alas-8 ti bigat agingga alas-5 ti malem iti Malcolm Square ken Perfecto Street Extension. Panggep ti programa a mangpabassit iti basura ken mangitag-ay iti panagurnos iti komunidad.
Mainaig ti aktibidad iti “Circular Economy” ken “Pansa-nopen” a programa ti siudad, kas paset met iti pannakarambak ti 2026 Saleng Festival. Iti daytoy, maiparangarang ti kinapateg ti panag-recycle, panagusar manen kadagiti banbanag, ken responsable a panagkonsumo tapno masalakniban ti aglawlaw.
Makatulong met ti programa kadagiti babassit a negosyo, grupo dagiti babbai, ken recyclers babaen ti panaglako kadagiti upcycled ken eco-friendly a produkto manipud kadagiti barangay.
Kadagiti dadduma pay nga aktibidad ket mairaman ti panagiwaras iti semilia dagiti agbunga ken kayo a pino, Information and Education Campaign (IEC), panagkolekta iti e-waste, yard sale, ken panagsinnukat iti household items iti komunidad.
Source: Baguio City Public Information office
