LAOAG CITY – Inpakaammo ni Mrs. Perlita Cabello, mangidadaulo ti City Social Welfare and Development Office ditoy siudad ti Laoag nga awanen ti agkaiwarang a badjao ditoy siudad ti Laoag.
Segun kenkuana, kas maobserbaran ket awanen ti makita a badjao iti langlangalang pakairamanan dagiti sumagmamano nga indibidual nga agdawdawat pay ti kuarta.
Inbatadna a daytoy ket babaen ti panangbukelda ti task force a bukbuklen ti Philippine National Police, City Disaster Risk Reduction and Management Office ken City Social Welfare and Development Office.
Kunana a dagitoy dagiti katulunganda tapno kitaen no adda dagiti badjao pakairamanan dagiti indibidual nga agdawdawat ti kuarta.
Inlawlawagna a maysa kadagiti makitkitada no apay nga in-inot a timmalaw dagiti badjao ditoy siudad ti Laoag ket ti pannakaadaptarda ti Mendicancy Law ditoy siudad ti Laoag.
Inpettengna a dakkel ti nagbalin a tulongna daytoy tapno madisiplina dagiti badjao ken ti tunggal maysa gapu ta babaen iti daytoy ket mamulta dagiti makitada a mangited ti kuarta.
Innayonna a daytoy nga ordinansa ditoy siudad ti Laoag ket mabalin nga adaptaren dagiti dadduma pay a Local Government Units tapno masursuroan dagitoy nga agsapul ti kuarta iti bukudda a nagbannogan.
Source: Bombo Radyo Laoag
