Conner, Apayao- Arestado ang dalawang miyembro ng Communist Terrorist Group (CTG) sa checkpoint operations ng Apayao noong Hunyo 12, 2022.
Kinilala ni Police Colonel Reynaldo S Ogay Jr., Provincial Director ng Apayao Police Provincial Office ang mga naarestong suspek na sina “Ka Cris”, 36, residente ng Bagong Pag-asa, Quezon City at “Ka Zin”, 30, residente ng Dagat Dagatan, Barangay Longos, Malabon City.
Ayon kay PCol Ogay Jr., bandang 9:30 ng umaga naaresto ang mga suspek sa Conner, Apayao sa pinagsamang operatiba ng Apayao PNP sa pangunguna ng 2nd Apayao Provincial Mobile Force Company kasama ang 98th Infantry Battalion, 5th Infantry Division, Philippine Army, 1505 Mobile Company, Regional Mobile Force Battalion 15, 53rd MICO, 5th MIB at Regional Intelligence Division Cordillera.
Ayon pa kay PCol Ogay Jr., nakatanggap ng tawag ang 2nd Apayao PMFC mula sa Kabugao MPS hinggil sa presensya di umano ng mga miyembro ng CTG na sakay ng dalawang motorsiklo na nasa harapan ng gasoline station sa Sitio Iyapan, Kabugao, Apayao patungo sa Conner-Tuguegarao Road.
Agad nagsagawa ang mga otoridad ng checkpoint operation kung saan pinara nila ang mga nasabing suspek at dito nga ay bumaba at nagsumbong sa mga otoridad ang apat na katao na angkas ng mga suspek at inihayag na pinilit di umano sila ng mga suspek na dalhin sa Tuao, Cagayan.
Dagdag pa ni PCol Ogay Jr., kinilala din ng mga sumukong former rebel ang dalawang suspek na miyembro ng Ilocos Cordillera Regional Committee (ICRC) – Kilusang Larangang Guerilla, North Abra.
Ang dalawang miyembro ng CTG ay nahaharap sa kasong paglabag sa Section 10 (Recruitment to and Membership in a Terrorist Organization) ng RA 11479.
Patuloy naman ang pagpapaigting ng PNP at PA sa kampanya laban sa kriminalidad at insurhensiya para sa katahimikan at kapayapaan ng rehiyon.
Source: Pnp Apayao PPO
