Nakemmeg ti maysa a sales agent iti naisayangkat a search warrant operation kalpasan a naalan ti shabu ken paltog idiay Barangay Mabilbila Norte, Santa, Ilocos Sur.
Ti suspek ket agtawen iti tallopulo ket pito, residente ti nadakamat nga ili.
Iti pannakiuman ti Bombo Radyo Vigan ken ni PMAJ Rovic Nemlida, ti Santa Municipal Police Station, pinasingkedanna nga adu pay ti napasamak a validation ken clarification kadagiti impormasion a maaw-awat da mainaig ti suspek sakbay da nga insayangkat ti operasion.
Naala manipud iti pagtaengan ti suspek ti agarup 0.80 a gramo ti shabu ken maysa a calliber .38 a paltog nga adda uppat a bala-na.
Sangoen ti suspek ti kaso a panaglabsing ti Republic Act No. 9165 wenno Comprehensive Dangerous Drugs Act of 2002 ken RA 10591 wenno Comprehensive Firearms and Ammunition Regulation Act.
Source: Bombo Radyo Vigan
