Pinalag-an ti Lokal a Gobierno ti Cateel ti panagbiahe ken panagserbi babaen iti panangtedna iti maysa a Bajaj Maxima Cargo tapno usaren dagiti kameng ti Revitalized-Pulis sa Barangay (R-PSB) Cluster 4 idiay Cateel, Davao Oriental.
Daytoy a lugan ket nagbalin a trending iti social media, a naggapuanna dagiti nadumaduma a reaksyon dagiti netizen. Adda dagiti nangkatawa ken adda met dagiti nangibilang a saan a makatulong daytoy. Ngem kadagiti agnanaed kadagiti adayo ken narigat a madanon a luglugar, dakkel daytoy a tulong, nangruna kadagiti pulis a ti panggep ken tarigagayda laeng ket ti agserbi iti publiko.
Ita, daytoy a lugan ket us-usaren ti R-PSB Cluster 4, agraman ti logo ti kapulisanna, tapno nasaysayaat a maipaayda ti serbisio kadagiti umili iti dayta a lugar. Dakkel daytoy a tulong gapu ta mabalinna a danonen dagiti adayo a luglugar ken mabalin met a pagawit dagiti produkto dagiti mannalon, nangruna kadagiti kalsada iti kabakiran a dagiti kalabaw ken baka laeng ti makalabas.
Saan a ginatang ti Philippine National Police (PNP) daytoy a lugan, no di ket maysa a naimpusoan a donasion manipud iti Gobierno ti Ili ti Cateel, iti panangidaulo ni Mayor Emilou C. Nuñez. Ti panggep daytoy ket tapno mapapaspas ken mapapadur-as pay ti panagipaay ti serbisio ken panagserbi kadagiti umili.
Ti Police Regional Office 11, iti babaen ti panangidaulo ni PBGEN Benigno L. Guzman, Acting Director, ket inyebkasna ti naindaklan a panagyaman ken panangidayawna iti LGU ti Cateel.
Daytoy ket pammaneknek ti panagtitinnulong ti PNP ken LGU tapno maipaay ti umiso ken nasayaat a serbisio publiko para kadagiti umili, tapno makadanon iti panagrang-ay ti nasantoan a daga a pagnanaedantayo.
