Pinirmaan ita nga Oktubre 12, 2026, ti Memorandum of Agreement (MOA) ti Gobierno ti Siudad ti Baguio ken ti Roman Catholic Diocese of Baguio tapno mapapigsa ti panagtitinnulongda iti panangsalaknib iti aglawlaw babaen iti programa a Pansa-nopen Tayo ken ti balabala ti Laudato Si’.
Babaen iti kasunduam, ti Commission on Environment ti Diocese of Baguio ti mangidaulo, mangitugot ken mangitag-ay kadagiti inisyatibo para iti aglawlaw, agraman ti pannakaipasdek kadagiti Materials Recovery Facilities (MRFs), panangipaay kadagiti panagsanay maipapan iti panagsina ti basura, panagrecycle ken panagaramid iti compost, ken pannakaipatungpal dagiti mensahe maipapan iti panangaywan iti aglawlaw kadagiti homilia, katekesis, aktibidad dagiti parokya ken kampanya kadagiti institusyon ti diyosesis.
Ti programa a Pansa-nopen Tayo ket mapondoan ken matulongan babaen iti European Union–Green Economy Programme in the Philippines (EU-GEPP), agraman ti pannakaipatungpalna babaen iti United Nations Development Programme (UNDP).
Babaen iti daytoy a pannakikadua, namnamaen a mapapigsa ti pannakipaset dagiti parokya ken institusyon ti Simbaan iti panangsalaknib iti aglawlaw ken panangpasayaat kadagiti naimbag a gawi para iti nasayaat ken natalged a komunidad.
Source: Baguio City Public Information Office
