Nadiskobre dagiti otoridad ti maysa a naabandona nga arms cache wenno pangidulinan kadagiti armas iti maysa a bantay idiay Tinoc, Ifugao itay kanikadua.
Sigun iti Police Regional Office-Cordillera Administrative Region (PRO-CAR), apaman a nakaawatda iti tip-off manipud iti maysa a simmuko a miyembro ti Kilusang Larangang Guerilya (KLG) Ifugao,nangipatungpalda a dagos iti operasyon a nagresulta iti pannakakumpiskar ti maysa a Claymore mine, hand grenades, rifle grenades, 40, cartridges, dynamites, detonating cords, assorted nagduduma a klase iti bala, bandoliers, ken nagduduma a personal a kagawaan.
Balligi ti nasao nga operasyon babaen iti nagtipon a puwersa manipud iti Regional Mobile Force Battalion 15, Tinoc Municipal Police Station,1st ken 2nd Ifugao Provincial Mobile Force Companies of the Ifugao Police Provincial Office, kadua ti Regional Intelligence Unit 14, National Intelligence Coordinating Agency-CAR, Provincial Explosive Ordnance Disposal and Canine Unit-Ifugao, PNP SAF-Ifugao, ken Philippine Army’s 501st and 54th Infantry Battalions,
Impetteng met ti PRO CAR Regional Director PBGEN NOEL B VALLO a babaen iti panangibaga ti sigud a kameng ti rebel group iti impormasyon kadagiti otoridad seknan kadagiti armas, naispalna dagiti umili ti Tinoc manipud iti posible a peggad.
Ginuyugoy met daytoy dagiti dadduma pay a miyembro ti communist terrorist groups a sumuko da metten ken impasiguradona a nakasagana ti gobyerno a mangtulong kadakuada iti pangrugianda babaen iti Enhanced Comprehensive Local Integration Program (E-CLIP).
Source: Bombo Radyo Baguio
