Kaso a frustrated murder ti sangwen ti lalaki a nangbagkong ti kalugaranna idiay Barangay Paratong, Sta. Catalina, Ilocos Sur.
Ti biktima ket lalaki nga agtawen iti uppat a pulo ket innem idinto a ti suspek ket lalaki nga agtawen iti uppat a pulo ket innem, agpada a taga-Barangay Paratong, Sta. Catalina.
Iti pannaki-uman ti Bombo Radyo Vigan ken ni PMaj. Medel Perinion nga OIC iti Sta. Catalina Municipal Police Station, naggapu a naki-inninom ti biktima iti kakabagyan ken kasinsinna idin agawiden ket kellaat nga adda nagpaguni kenkuana ken nangiggem, nga isun ti nakariknaanna nga adda nangbagkong iti tengngedna.
Segun ken ni Perinion, nakaawid pay laeng ti biktima a nagpaarayat iti inana isu a dagus a naipan iti Ilocos Sur Provincial Hospital – Gabriela Silang para iti pannakatamingna idinto a ti suspek ket nakemmeg.
Kinuna ni Perinion a dati a susik iti posible a rason ti suspek iti pammagkong ta idi kallabes ket adda saanda a pagkinnaawatan iti maur-urnong a danum a saan a rumuar iti paraanganda.
Mapapati nga agpaut pay iti panagpalaing ti biktima iti ospital gapu iti kakaru iti sinagabana a dunor gapu iti insidente.
Source: Bombo Radyo Vigan
