Nakiipaset ti Cagayan Police Provincial Office (Cagayan PPO) iti panangsuporta iti inisyatibo ti Department of Education (DepEd) Regional Office II a mangpapigsa iti kampania kontra bullying babaen iti Learner Rights and Protection (LRP) on Wheels nga addaan iti tema a “Karapatan Ko, Protektado Ako,” a naisayangkat idi Hulyo 27, 2026 iti Cagayan National High School, Tuguegarao City.
Pinanguluan dagiti opisial ti DepEd Region II ti nasao a programa a nakipasetan dagiti student leaders manipud kadagiti nadumaduma nga organisasion, regional ken division officials, school heads, registered guidance counselors, ken junior ken senior high school student leaders manipud kadagiti nadumaduma a Schools Division iti Rehiyon Dos.
Nakiambag met ni PCpt Shiela Joy N. Fronda, Chief, Public Information Office ti Cagayan PPO, babaen iti panangitedna iti lecture maipanggep iti Republic Act No. 10627 wenno Anti-Bullying Act of 2013, a mangilawlawag kadagiti kita ti bullying, responsibilidad dagiti pagadalan iti panangipatungpal kadagiti anti-bullying policies, umno a panangireport kadagiti insidente, ken panangsalaknib iti karbengan dagiti biktima.
Iti mensahe dagiti opisial ti DepEd, naipaganetget ti kinapateg ti panangbigbig iti karbengan dagiti agadal, panangtungpal iti responsibilidad kas nasayaat nga umili, ken panangitag-ay iti kultura ti panagraem, integridad, ken panagpapada iti uneg dagiti pagadalan. Impakita metda a ti bullying ket saan laeng a simple a panang-uyaw no di ket maysa a seryoso a panagsalungasing iti karbengan dagiti estudyante a masapul a dagus a masolbar.
Ti Learner Rights and Protection on Wheels ket tapno mapapigsa ti pannakaammo dagiti agadal maipanggep iti karbenganda ken responsibilidadda, ken tapno maipasdek ti natalged, natalna, ken narespeto a kapaligiran iti amin a pagadalan. Babaen iti daytoy nga inisyatibo, patibkeran ti DepEd Region II ken Cagayan PPO ti nagkaykaysa a panggep a mapukaw ti kultura ti bullying ken masigurado a tunggal ubing ket maprotektaran iti panagadal ken panagdur-as.
Source: Cagayan Police Provincial Office
