Pinagtinnulongan dagiti kameng iti Bureau of Fire Protection-Baguio ken dagiti kapulisan manipud Station 1 iti Baguio City Police Office (BCPO) nga iyaon ti maysa a lalaki a natinnag iti manhole ken drainage system sadiay Magnolia Street, San Luis Village, Baguio City, iti oras a 4:25 iti malem idi Hunio 16, 2026.
Maibasar iti report iti pulisya, ti lalaki nga agtawen iti 21 ken maysa nga estudiante ti nang-uli iti makinlikod a paset iti balay da tapno “sukiten” ti tulbek iti balay da a nalipatan na iti uneg ti kuarto na.
Naala na met daytoy ngem idi bumababa koman daytoy iti agdan nga inusar na ket naikaglis ti saka na rason tapno matinnag iti manhole. Nagresulta met daytoy iti pannakadunor ken mapapati a pannaka-fructure iti palay-palay wenno “ankle” iti kannawan a saka na.
Gaputa saan a makauli ket nagpaarayat ti biktima. Nangngeg met daytoy iti kaaruba na a dagus nga immawag iti istasyon iti pulisya tapno ipakaammo ti napasamak.
Base iti kaudian a report iti pulisya, apaman a maiyaon iti nakatinnagan na ti lalaki ket naitaray daytoy sadiay ospital para iti kanayunan a pannakataming na.
Source: DZWT 540 AM – News & Information
