Nagballaag ti Department of Health–Cordillera (DOH-CAR) kalpasan a nakairekord iti sangapulo ket dua a kaso iti nasabidong nga indibidual gapu iti pannanganda iti “wild mushroom” wenno uong iti rehion.
Sigun iti nasao nga ahensia, dagiti pasiente ket agtawen iti 10 agingga 56, nu sadinno 10 ti lalaki ken dua ti babai.
Amin a kaso ket adda pakainaiganna iti pannangan kadagiti uong a narigat a maamuan nu natalged a makan wenno makasabidong.
Binallaagan iti ahensia ti publiko a liklikan a mangan kadagiti wild mushroom malaksid nu daytoy ket saan a makasabidong .
Ti sumagmamano a makasabidong a kita iti uong ket kapada dagiti makmakan a kita ken mabalin a mangitunda iti nakaro a marikna wenno ipupusay.
Indagadagna metlaeng ti dagos a panagpakonsulta iti kaasitgan a pag-agasan kaspangarigan makapasar iti panagbakwar, panagtakki, panagulaw, wenno panagsakit iti tian kalpasan a mangan iti uong.
Agtultuloy met a makikikoordinar ti DOH-CAR kadagiti lokal a gobierno tapno papigsaen ti kampania iti impormasion ken maliklikan ti kanayunan a kaso iti panagtutudo.
Source: Bombo Radyo Baguio
