Nakikaykaysa ti Kilusang Mayo Uno-Cordillera kadagiti proresibo a grupo a nangisayangkat kadagiti tignay-protesta iti siudad ti Baguio, National Capital Region, ken dadduma pay a rehion kagiddan iti panangrambak iti Araw ng Kalayaan idi Hunio 12, 2026.
Iti pannakiuman iti Bombo Radyo kenni Mike Cabangon, dadaulo iti Kilusang Mayo Uno-Cordillera, kinunana a numan pay awan ti insayangkatda a tignay-protesta, makikaykaysada kadagiti progresibo a grupo iti takderda.
Sigun kenni Cabangon, saanda nga ibilang a simple a panangrambak ti Araw ng Kalayaan gaputa para kadakuada ket adu paylaeng ti isyu a mangipakpakita a saan a nawayawayaan ti Pilipinas.
Impettengna a panggep kadagiti protesta a tubngaren ti presensia iti base militar iti Estados Unidos iti Pilipinas, kasta metten ti mapapati a pannakaibangon kadagiti pasilidad ken pagurnongan iti armas iti pagilian.
Kinondenar metlaeng iti grupo ti panagaprobar kadagiti nasao nga addang, a sigun kadakuada ket saan a “makatao” ken maibilang a panagtalikod iti interes iti pagilian.
Dinakamat metlaeng ni Cabangon ti nagduduma nga isyu a sangsangwen ti Pilipinas, karaman dagiti mapaspasamak iti Senado.
Sigun kenkuana, dagiti addaan iti bileg mismo ti mangituntunda iti riribuk iti institusion gapu iti mapapati a panangagaw kadagiti posision ken bileg.
Source: Bombo Radyo Baguio
