Pinasinayaan iti Bureau of Fire Protection (BFP) Camalaniugan ti baro a pasilidad ken pagtaenganda babaen iti maysa a Blessing and Inauguration a naangay idi Huwebes, Hunyo 11, 2026.
Nakipaset iti aktibidad ni Gobernador Edgar “Tatay Egay” Aglipay a nangipakita iti suporta na iti agtultuloy a panagserbi dagiti bombero iti probinsia.
Pinanguluan ni BFP Regional Director FSSUPT Victoria Domingo ken Cagayan Provincial Fire Marshal Pedro Espinosa ti nasao nga aktibidad a sinarakupan dagiti opisial ti lokal a gobyerno, kameng ti BFP, ken sabali pay a bisita.
Iti mensahena, inyebkas ni Gobernador Aglipay ti panagyamanna kadagiti mangmangted serbisyo iti BFP gapu iti dedikasionda iti panangtungpal iti mandato ti ahensia ken iti kinasaganada a tumulong ken sumungbat iti oras ti kasapulan ken emerhensia.
Paset ti seremonia ti panangbendision iti gusali ken pananglukat iti commemorative marker. Impaganetget ti Gobernador ti napateg a papel ti BFP iti panangsalaknib kadagiti umili, saan laeng iti panangresponde iti uram no di ket kasta met iti disaster response, rescue operations, ken dadduma pay a trabaho a mangitag-ay iti seguridad ti komunidad. Kinunana a babaen kadagiti napabaro a pasilidad, mas mapapigsa pay ti kabaelan ti BFP a mangited iti napardas ken episiente a serbisyo para iti pagimbagan ken kinatalged dagiti Cagayano.
Source: Cagayan PIO
