Pinasingkedan ti Department of Health (DOH) ti napateg a papel dagiti Pilipino a pharmacist kas kangrunaan a lider iti panangpabaro iti pampubliko a salun-at iti pannakipasetda iti Philippine Pharmacists Association (PPHA) National Convention 2026, a nangayab iti pannakapapigsa ti panagtitinnulong, panag-innobasyon, ken panagserbi a nakasentro iti pasyente tapno mapadur-as ti Universal Health Care (UHC). Naangay daytoy iti Vigan, Ilocos Sur idi napalabas a bulan ti Abril 2026.
Iti mensahe a naited iti nagan ni Health Secretary Teodoro Herbosa, kinuna ni DOH-Ilocos Regional Director Paula Paz M. Sydiongco a ti masakbayan ti healthcare ket saan laeng a maipapan iti polisiya, no di ket iti panagtitinnulong dagiti amin a propesyonal iti salun-at iti espiritu ti bayanihan.
Naibatay iti tema a “Honoring Our Heritage Through Embracing the Future of Philippine Healthcare,” naipakita met iti kombension ti kinaagtalinaed dagiti pammati ken pateg a Pilipino iti panangaywan ken komunidad. Manipud kadagiti tradision a panagagas dagiti babaylan agingga iti moderno a pharmaceutical care, ti propesyon ket agtultuloy a naipundar iti panangngaasi ken panangisalaknib, kabayatan a sumangsangbay kadagiti baro a karit iti salun-at.
Source DOH Ilocos Region
