Naipaayan iti insentibo ti dua a civilian informant itay agsapa sadiay Police Regional Office Cordillera (PRO-CAR), Camp Bado Dangwa, La Trinidad gapu iti panangipaay da iti impormasyon a nagresulta iti balligi a pannakaipatungpal iti anti-illegal drug operation iti rehion Cordillera.
Ti nasao nga aktibidad ket babaen iti Operations “Lawmen” ken “Private Eye” nga ipatpatungpal iti Philippine Drug Enforcement Agency.
Naipaayan ni “Bojic” iti Php369,363.06 iti panangipaay na iti impormasyon iti PDEA-CAR Mountain Province Provincial Office no sadino balligi ti pannakakumpiskar iti 61.536 a kilos iti dried marijuana fruiting tops bayat iti buy-bust operation sadiay Barangay Agbannawag, Tabuk City, idi October 3, 2025.
Naawat met ni “Mon” ti Php126,979.86 iti panangipaay na iti impormasyon iti PDEA CAR Baguio/Benguet Provincial Office a nagresulta iti pannakakumpiskar iti 21.163 kilos iti dried marijuana leaves ken fruiting tops ken ti pannakakemmeg ti dua a drug personalities bayat iti buy-bust operation sadiay Legarda–Burnham–Kisad parking area, Baguio City idi July 11, 2025.
Segun kenni Undersecretary Isagani Nerez, Director General iti PDEA, agdagup Php96 million ti nailatang a pondo para iti Operations “Lawmen” ken “Private Eye”.
Guyguyuguyen na dagiti indibidual nga addaan iti impormasyon mainaig iti illegal a droga a dagus nga agreport kadagiti awtoridad kas iti PDEA, Philippine National Police, National Bureau of Investigation, ken dadduma pay.
Impanamnama met ni Sec. Oscar Valenzuela, Chairman iti Dangerous Drugs Board ti seguridad dagiti civilian informant. Impannakel ni Nerez nga adu ti naballigi nga operasyon gapu iti Operations “Lawmen” ken “Private Eye”.
Inwaragawag na nga iti nasurok dua a tawen, nakakumpiskar da iti dakkel a volume iti iligal a droga iti sidong ti agdama nga administrasyon. Daytoy ket dakdakkel no idilig kadagiti napalpalabas nga administrasyon.
Inyunay-unay na a naragpat da ti nasao a balligi babaen iti panakitinnulong dagiti nadumaduma a line agencies.
Source: DZWT 540 AM – News & Information
