Napasamak ti duwa a nagsaruno a insidente ti forest fire sadiay munisipyo ti Mankayan ita a lawas, a nagresulta iti panakauram ti agarup 19 a hectares ti kabakiran iti nadumaduma a barangay.
Segun kenni SFO2 Elmer Maton, Chief of Operations ken Investigator ti Bureau of Fire Protection (BFP) Mankayan, manarimaan pay laeng ti imbestigasyon da maipanggep iti gapuanan dagiti uram nga insidente.
Imbinglay ni SFO2 Maton a napasamak ti umuna nga uram idi Pebrero 2, 2026 sadiay Sitio Bayuyo, Barangay Tabio, Mankayan, Benguet. Nakaawat ti BFP iti report iti uram idi pasado alas singko ti malem ken naideklara a fire out iti agarup alas dies ti agsapa idi Pebrero 3, 2026. Agarup lima (5) nga hectares ti kabakiran ti naapektaran iti nasao nga insidente.
Inyebkas na nga adda posibilidad a dagiti umili ti makin-aramid, intentional man wenno saan, ta nangrugi ti uram iti paset nga agpagpagnaan dagiti tattao.
Kabayatanna, nangrugi met ti maikadua nga uram idi Pebrero 4, 2026 sadiay Sitio Manpey-as, Barangay Bulalacao, Mankayan, Benguet. Nai-report ti uram iti alas singko ti malem ken naideklara a fire out iti alas siete ti agsapa idi Pebrero 5, 2026. Gaputa napigsa ti angin, naapektaran met ti Barangay Guinaoang no sadino agarup 14 nga hectares ti kabakiran ti nauram.
Insalaysay ni SFO2 Maton nga adda dagiti parikut a nasabat ti BFP bayat ti panagresponde da, kas iti narigat a terrain paturong iti kabakiran ken ti kakurangan ti personnel ti BFP Mankayan para iti panakasebseb ti apoy. Nupay kasta, inyebkas na ti panagyaman na kadagiti umili nga aktibo a nakibinnadang iti operasyon.
Inyunay-unay ni SFO2 Maton nga rumbeng a siguraduen dagiti mannalon a kontrolado ti apoy no aglinis da iti garden da. Imbalakad na met kadagiti indibidual a saan da a baybay-an ti upos wenno rungrong ti sigarilyo da no adda da iti kabakiran. Innayon na pay a no adda dagiti agpiknik iti kabakiran, rumbeng a maseguro da ti paglutlutuan da tapno maliklikan ti pannakapataud ti uram.
Source: DZWT 540 AM – News & Information
