Agsasaganan dagiti lokal a mannalon para iti Strawberry Festival inton bulan ti Marso, maysa a mabigbigbig a selebrasion iti La Trinidad, Benguet.
Segun kenni Jefferson, maysa a mannalon iti strawberry, nakatutok da iti panangaywan ken panangusar iti abono tapno adu ti bunga inton dumteng ti selebrasion. Innayon na a napateg ti nasayaat a panagsagana gapu iti manamnama nga adu a bisita ken turista.
Immapela met dagiti mannalon kadagiti turista a pagtalinaeden da kinadalos iti plantasyon. Adda ngamin dagiti bidita nga agiwara wenno agibati iti adu a basura, kas iti plastik.
Segun kenni Luis Selvestre, maysa a turista a naggapu iti Pangasinan, responsibilidad dagiti turista ti panangpatalinaed iti kinadalus ken kinapintas dagiti lugar a pasyaren da.
Inyunay-unay ni Jefferson a ti uma wenno ti Strawberry Farm ket saan laeng a pagbiagan dagiti mannalon, no di ket isu met ti mangipakita iti kinapintas ti lugar.
Ti lokal a gobierno ti nangipataw iti environmental fee para iti pannangmintenar iti aglawlaw. Kabayatan na, ti Strawberry Festival ket maangay inton bulan iti Marso.
Source: DZWT 540 AM – News & Information
