Indauluan ni Department of Public Works and Highways (DPWH) Secretary Vince Dizon, kaduana ni Cagayan Governor Edgar “Manong Egay” Aglipay ken Alcala Mayor Tin Antonio, ti opisyal a panaglukat ti Piggatan Detour Bridge idi Biyernes, Disyembre 19, 2025. Ti proyekto ket importante tapno mapasayaat manen ti panagdaloy ti trapiko ken biyahe dagiti umili ken biyahero iti probinsia.
Segun kenni Secretary Dizon, naipalpas ti detour bridge a naggastos iti agarup Php19 milyon iti laeng dua a bulan, kas iti kari na kalpasan ti panagbagsak ti daan a Piggatan Bridge. Impaganetget na a mabalin ti napartak ken kalidad a panagpatungpal ti proyekto no umuna ti nasayaat a trabaho ken napudno a serbisyo publiko.
Mailagip a nabagsak ti Piggatan Bridge idi Oktubre 6, 2025, a nangted iti dakkel a rigat kadagiti motorista, biyahero, ken residente ti Alcala ken dagiti asideg a ili. Gapu iti daytoy, dagus nga immaksyon ti DPWH a nangipatungpal iti detour bridge kas temporario a solusyon bayat ti panagplano ti permanente a rangtay.
Inayon pay ni Secretary Dizon a mangrugi ti panagaramid ti permanente a rangtay iti Enero wenno Pebrero iti sumaruno a tawen. Adda pay plano a panagpasayaat ken panagaramid iti daduma pay a detour bridges iti Baua ken Patteng Bridge iti Gonzaga, ken panag-ayos ti Magapit Bridge iti Lal-lo ken Buntun Bridge iti Tuguegarao City, kaduana ti panagsimento ti Sto. Niño–Lasam Road a alternatibo a ruta dagiti dadakkel a sasakyan.
Kabayatanna, kinuna ni DPWH Region 02 Regional Director Mathias Malenab a natalged ken napigsa ti detour bridge ken mabalin a pagdalanan dagiti lugan nga addaan karga agingga 40 tonelada. Adda met naituding a personnel a magbantay 24/7 tapno masigurado ti seguridad, bayat nga inyaay ti pasasalamat ni Mayor Tin Antonio ken Secretary Dizon gapu iti napardas ken natungpal a panagtulong iti umili ti Alcala.
Source: Cagayan Provincial Information Office
