Labing-isang Child Development Centers (CDCs) sa bayan ng Mangaldan ang masayang tumanggap ng iba’t ibang learning materials na ipinagkaloob nina Mayor Bona Fe De Vera Parayno at MSWD Officer Rowena De Guzman nitong Lunes, Setyembre 15, 2025, sa Conference Room ng Presidencia de Mangaldan.
Ang mga nasabing educational materials ay donasyon mula kay Mrs. Sarah Itliong Yap, isang tubong Barangay Embarcadero na kasalukuyang naninirahan sa Malaysia.
Kabilang sa mga nakatanggap ng learning materials ang mga CDCs mula sa Barangay Macayug, Embarcadero, Navaluan, Osiem, Inlambo, Bateng East, Bateng West, Lanas, Tebag, Guiguilonen, at Salaan. Malaking tulong ang mga ito upang higit pang mapabuti ang kalidad ng pagkatuto ng mga batang mag-aaral.
Buong puso namang ipinaabot ng lokal na pamahalaan at ng mga benepisyaryong CDCs ang kanilang pasasalamat kay Mrs. Yap at sa kanyang pamilya sa kanilang bukas-palad na pagbibigay bilang tanda ng pagmamahal sa sariling bayan.
Source: PIO Magaldan LGU
