Matagumpay na isinagawa ang isang makabuluhang aktibidad sa ilalim ng I Love Cagayan River Movement sa bayan ng Lal-lo, Cagayan. Sa pamamagitan ng programang Livelihood Assistance thru Cash-for-Work ng Provincial Natural Resources and Environment Office (PNREO), 185 benepisyaryong kabilang sa grupong Agkaykaysa ang nagtulung-tulong sa pagtatanim ng mga kawayan at punong namumunga kahapon ika-6 ng Setyembre 2025.
Isinagawa ang pagtatanim sa Barangay San Mariano, Lal-lo, kung saan umabot sa kabuuang 1,200 halaman ang naitanim. Kabilang dito ang 600 propagules ng kawayan at 600 punong namumunga tulad ng 305 puno ng Lubeg, 275 puno ng Citrus, at 20 puno ng Avocado.
Ayon sa PNREO, malaki ang maitutulong ng mga itinanim na punong ito sa pagpigil ng soil erosion, pagpapalago ng lokal na agrikultura, at pagbibigay ng karagdagang kita sa mga benepisyaryo sa hinaharap. Isa rin itong hakbang para sa mas masiglang pagpapatuloy ng kampanya sa rehabilitasyon at pangangalaga sa Ilog Cagayan.
Ang ganitong uri ng programa ay patunay na posible ang pagsasabay ng proteksyon sa kalikasan at pagbibigay ng kabuhayan sa mga komunidad. Inaasahan na mas marami pang katulad na proyekto ang isusulong sa mga darating na buwan upang mas mapalawak ang positibong epekto nito sa lalawigan ng Cagayan.
Source : PNREO CAGAYAN
